@olamasri8_7570
أنا علا المصري أم لولد عمره ٨ سنوات
بعاني من السمنة من وقت البلوغ و الوراثة كانت حجتي دائما باعتبار معظم العائلة عنا وزنهم زايد و كانت حجة رائعة لانسانة كسولة و مدللة و بتكره الحركة و الرياضة و الاكل الصحي
كنت دائما اظهر للناس انو شكلي اخر همي و انو انا عاجبني حالي كيف ما كان و كلام الناس و نظراتهم اخر همي. رغم انو الحقيقة عكس هالشي تماما و القهر الحقيقي لما انزل عالسوق لجيب تياب و مالي مقاسي او يكون عنا حفلة و فستاني يطلع بشع لانو جسمي شكلو بشع. صرت اكره الحفلات و قضي معظم وقتي بالبيت لحد ما قررو اهلي ياخذوني لعند استشاري سمنة و نصحنا بعملية تصغير المعدة. و فعلا عملت العملية و نزلت ٤٥ كيلو بأقل من ٦ شهور و هالشي خلاني سعيدة جدا رغم المشاكل الصحية اللي عانيت منها بعد العملية و خاصة نقص الفيتامينات للي لحد الان ما عم اقدر اداركو بس على الاقل صرت قادرة اطلع على حالي بالمراية و ابتسم و صرت وقف بالصف الاول بالصورة بدال ما اتخبى ورا شي يغطي حجمي و بعد عمليتي ب ٦ سنوات اخذت قرار الامومة❤️ و خلال فترة حملي الاولى ما سمنت غير شي كتير بسيط بس اخر ٣ شهور سافرت لاميركا و كان جو جديد و مسؤوليات مو متعودة اتحملها بلش وزني يزيد و بعد الولادة صار معي ضغط نفسي و المهرب الوحيد بسبب كسلي و قلة نشاطي كان الاكل و القعدة بالبيت و من دون ما اشعر بالكارثة لقيت حالي ما عم اقدر وقف عاداتي السيئة و رجع وزني بسنتين اكتر من قبل ما اعمل العملية. يعني راح العذاب كلو عالفاضي و اما استشرت الدكاترة قالولي انو هرمونات الجسم بتتغير بالحمل و رجع جسمي قابل للزيادة متل قبل? و رجعت اقنع نفسي اني منيحة و انو الشكل اخر همي? لحد مرة كنت مع ابني بالحديقة و بدو العب معو و اكتشفت اني مو قادرة غير اعمل خطوات صغيرة و بعدها اتعب كتير. زعلت من حالي انو عم روح عمري بكيس شيبس و صحن معكرونة ? و انو بس يكبر ابني مارح يكون النا ذكريات سوى و اشتركت ببرنامج نادز و كان نازل جدبد التطبيق
ضليت اكتر من سنتين جدد الاشتراك بس ما اقدر العب لانو حتى التمارين البسيطة كانت مستحيلة بالنسبة لعضلاتي المصابة بالخمول التام?. نزلت اجازة على سوريا السنة الماضية و صار معي جرثومة بمعدتي و صابني اسهال و صرت اتبع نظام حمية و المفاجأة اني نحفت ٤ كيلو بشهر ? تجدد الامل عندي و قررت بلش رياضة و بدال فكرة اني متقبلة شكلي البشع حطيت فكرة انو مافي شي مستحيل انو التكرار بولد النجاح. والتزمت بتحديات رمضان مع نادر و صارت النتائج تظهر بشكل ملحوظ و بعدين التزمت ببرنامج الكارديو و تمارين الكوتش تسنيم و خلصت تحدي انزال الوزن1 و الحمد لله بسبب الرياضة نزلت ٢٧ كيلو من وزني بسنة و شهرين و صارت الرياضة هي المتعة الاساسية بحياتي و صار تفكيري صحي اكتر
تعلمت انو الرياضة بتقوي شخصيتي و بتحسن نفسيتي و مزاجي و صرت احلى و اقوى و مافي شي بحياتي اسمو مستحيل
صح وجع الرياضة قوي بس هاد الوجع الحلو اللي بعدو بحس بنشاط و بقوة و بسعادة
لا تستسلمي و تذكري دائما انو قد ما كانت شخصيتك للناس قوية اذا مو قادرة تتحكمي بجسمك معناها انت ضعيفة. بلشي بحالك و اذا فشلتي لا تيأسي و كرري المحاولة و رح تلاقي نتائج مبهرة. انا ما صدقت انو ارادتي قوية الا بعد ما التزمت بالرياضة
